Films in svilup e producziun

2017 sun croudads trais milliuns tonnas material dal Piz Cengalo e sun sfratamats our per la Val Bondasca in direcziun dal cumün da Bondo. La vita illa Val Bergiaglia es daspö quel di ün’otra. Daspö lura vegna rumi sü, reconstrui e sgürà a Bondo. L’indschegner Jürg Conzett e sia squadra construischan 5 punts e sgüran la cuntrada per proteger la fracziun da Spino ed il cumün da Bondo. Els tiran üna lingia nouva per la via chantunala e fan mürs culla crappa chi’d es gnüda manada culla boda giò’n val. Conzett as confuonda cun dumondas pertoccond la tecnica e l’economia. Da tschella vart dessan sias ouvras eir evochar sentimaints pro las persunas chi vivan là e pro quellas chi sun da passagi.  Eir scha sias ouvras van als cunfins da quai chi’d es pussibel, ellas stan in üna stretta relaziun culla topografia. Conzett nu sforza sia visiun, anzi quella dess servir e sustgnair quai chi sto gnir fat.  

Augusto Giacometti, chi gniva nomnà il maister da las colurs es creschü sü in Bergiaglia a Stampa, pac toc davent da la famiglia dad Alberto Giacometti.  Els tuots han dedichà lur vita a l’art e sun viagiats pel muond. Illa val natala as giaivan las duos famiglias our d’via. Gnanca lur gronda paschiun per l’art nun es statta buna da tils unir.  Il film documentar vegn sviluppà actualmaing. Davo il film «I Giacometti» chi’d ha gnü grond success illas salas da kino in Svizra, seguisch eu las passivas da culur da l’artist Augusto Giacometti, in Bergiaglia, a Turich e per il muond.   

“Does the flap of a butterfly’s wings in Brazil set of a Tornado in Texas?” 
Edward N. Lorenz 

Cullinas da naiv roudlan giò per la costa. I schmachan bels muosters aint la surfatscha suolva da la naiv lomma. Mincha culla ha üna passiva individuala. I da da quellas chi’s ferman, chi vegnan bloccadas ed otras chi svanischa davo il prossem muot. Las cullinas ans piglian cun sai sün ün viadi müravglius tras il muond ed il temp. Las ultimas cullinas da naiv rivan fin a la riva dal mar e schleuan là. Intant as divertischan ils umans aint l'aua choda e nu paran da badair che chi capita.